ശബരിമലയിലേക്ക് എല്ലാ സ്ത്രീകൾക്കും പോകാം.. എന്തിന്... ? UAE KMCC പ്രസിഡന്റ് പുത്തൂർ റഹ്മാൻ എഴുതുന്നു

സഹോദര സമുദായങ്ങളുടെ ആചാരാനുഷ്ടാനങ്ങളിൽ അഭിപ്രായം പറയുന്നതിൽ അനൗചിത്യമുണ്ട്. എങ്കിലും മത നിന്ദയും അരുതായ്മകളും കാണുമ്പോൾ എങ്ങിനെ അഭിപ്രായം പറയാതിരിക്കും ? എല്ലാ മതങ്ങളിലും അവയുടെ ശാസനകളും ആചാരങ്ങളും അനുഷ്ടാനങ്ങളും ഉണ്ട്. അതൊക്കെയും ഇന്ത്യൻ ഭരണഘടന നിർമ്മിക്കുന്ന കാലത്തിനു നൂറ്റാണ്ടുകൾ മുമ്പ് രൂപകല്പന ചെയ്യപ്പെട്ടവയാണ്. അത് കൊണ്ട് തന്നെ ഭരണ ഘടനക്കനുസരിച്ചു മതസംസ്കാരങ്ങളിൽ ഭേദഗതികൾ വരുത്തുക എന്നതിൽ അപ്രായോഗികതയുണ്ട്. വിശ്വാസികൾക്ക് വിശ്വാസികൾ ആയിരിക്കാനുള്ള സ്വാതന്ത്ര്യം ഉറപ്പാക്കുകയാണു വാസ്തവത്തിൽ ഭരണഘടനയുടെ നയവും ലക്ഷ്യവും.

മതങ്ങളുടെ ആചാരങ്ങളിൽ യോജിക്കുന്നവരും വിയോജിക്കുന്നവരുമുണ്ടാവാം. പൂർവികരായ പണ്ഡിതരും മഹർഷിമാരും രൂപപ്പെടുത്തിയ ആചാരങ്ങളും അനുഷ്ടാനങ്ങളും ആധുനികതയുടെ കുതിരപ്പുറത്തു കയറി മാറ്റി മറിക്കണം എന്ന് ശഠിക്കുന്നത് ധാർമ്മികതക്കു നിരക്കുന്നതല്ല. മതമില്ലാത്തവർക്കേ അങ്ങിനെ പറയാൻ കഴിയു .

മതത്തെ ബാധിക്കുന്ന ഇത്തരം പ്രശ്നങ്ങൾക്ക് കോടതി കയറാൻ പാടില്ലായിരുന്നു , ഇത് തട്ടിപ്പു കേസോ വഞ്ചന കേസോ അടിപിടി കേസോ അല്ലല്ലോ. അമ്പലത്തിൽ ഏതു ശ്ലോകം എത്ര തവണ ചൊല്ലണം, എത്ര തവണ പ്രദക്ഷിണ നടത്തണം ഇതൊക്കെ കോടതിക്ക് തീരുമാനിക്കാൻ കഴിയുമോ ?

”Shabarimala”അമ്പലത്തിൽ സ്ത്രീകൾക്ക് പ്രവേശനത്തിന് വാദിക്കുന്ന വരട്ടു രാഷ്ട്രീയക്കാരോട് ചോദിക്കട്ടെ! നിങ്ങളുടെ പാർട്ടിയിൽ സ്ത്രീകൾക്ക് എത്ര ശതമാനം പ്രവേശനമുണ്ട് ?പാർലമെന്റിലും അസംബ്ലിയിലും 50 % വനിതാ പ്രാതിനിധ്യം നല്കാൻ കഴിയാത്ത നിങ്ങളാണോ ക്ഷേത്രത്തിൽ സ്ത്രീകളുടെ പ്രവേശനത്തിന് മുറവിളി കൂട്ടുന്നത് ?

ക്ഷേത്രത്തിൽ പോകുന്നത് ഭക്തി സാന്ദ്ര സാഹചര്യത്തിൽ ഏകാഗ്രതയോടെ, പവിത്രമായ മനസ്സോടെ, സംശുദ്ധമായ ശരീരത്തോടെയായിരിക്കണമെന്നു നിർബന്ധമുള്ളവരാണ് ഭക്ത ജനങ്ങൾ‌. സ്ത്രീ പ്രവേശനത്തിലൂടെ ഈ ഏകാഗ്രതക്കു ഭംഗം സംഭവിക്കാൻ സാധ്യത ഏറെ. തിക്കും തിരക്കും അതിന്റെ പരമോന്നതിയിൽ എത്തുന്ന ദർശന നടയിൽ സ്ത്രീയും പുരുഷനും ഇട കലർന്നാൽ ഉണ്ടാകുന്ന അസ്വാരസ്യം ഭക്ത ജനങ്ങൾക്ക് ഭൂഷണമാണെന്നു ഏതെങ്കിലും ഒരു ഭക്തൻ പറയുമോ.? മതത്തെയും അതിന്റെ ആചാരങ്ങളെയും അതിന്റെ വഴിക്കു വിട്ടു കൂടെ..?

പുത്തൂർ റഹ്മാൻ
President UAE KMCC - National Committee